Skíðaferð og gjaldþrot

Rétt að taka fram i byrjun að þessi tvö atriði í fyrirsögninni eru alveg aðskilin efni   

Ég hef verið latur að blogga undanfarið, enda ekki mikið að gerast hjá mér.  Og það væri að bera í bakkafullan lækinn að tjá sig um ástandið í þjóðfélaginu að ekki sé talað um sandkassa-og skrípaleikinn í leikskólanum við Austurvöll.

Í fyrramálið yfirgefum við skerið og höldum í skíðaferð til Ítalíu.  Verðum í Madonna di Campiglio, þeim ágæta skíðabæ, en þar höfum við verið einu sinni áður, fyrir nokkrum árum.  Kannski ég reyni að blogga aðeins í ferðinni ef einhver skyldi hafa áhuga á að heyra frá okkur.  Ég verð þarna í tvær vikur en Jónína og ferðafélagar okkar í eina viku.

En úr því að ég er byrjaður að skrifa ætla ég þó að nefna eitt atriði sem mér finnst áberandi í fréttum þessa dagana, en það er umfjöllun um gjaldþrota fyrirtæki.  Það er eins og fréttamenn forðist að nota þetta ágæta orð "gjaldþrot" en þess í stað er talað um að fyrirtæki séu komin í þrot, leitað sé að nýjum eigendum, eiginfjárstaða sé neikvæð og fleira í þeim dúr.  Og lögum samkvæmt er bannað að reka félag sem er með neikvæða eiginfjárstöðu - en það er annað mál.  Gott dæmi er Árvakur hf., útgáfufélag Moggans, en þar er talað um að leitað sé að nýjum eigendum og fjárfestum gefinn kostur á að bjóða í herlegheitin.   Staðreyndin er auðvitað sú að hlutafélagið Árvakur er gjaldþrota, skuldir eru meiri en eignir og félagið var komið í greiðsluþrot þegar viðskiptabanki þess ákvað að halda því á floti um sinn meðan reynt væri að selja eignir búsins.  Það liggur ljóst fyrir að nýjir aðilar eru að gera tilboð í eignir og rekstur félagsins en ekki í hlutafélagið Árvakur, enda er það svo skuldsett að það á sér ekki viðreisnar von og lánardrottnar munu þurfa að afskrifa hluta skuldanna.   Því miður eru fjölmörg önnur félög í svipaðir stöðu og við blasir ekkert nema gjaldþrot.

Athugasemdir

[Ágústa Þorkelsdóttir (IP-tala skráð) 17.2.2009 kl. 01:31]

Bragi, góði vinur, ég er ekki gjaldþrota, hvorki tæknilega né á nokkurn annan hátt.  Er núna á námskeiði sem heitir Vaxtarsprotaverkefni.  Þegar kaupfélögin á Raufarhöfn, Vopnafirði og Egilsstöðum voru öll orðin gjaldþrota ákvað ég að veðja á einkarekstur og er nú að undirbúa stofnun fyrirtækis, komin með hlutafjárloforð og er að vinna í áætlanagerð.  Þegar karllægur partur þjóðfélags okkar verður gjaldþrota er greinilega komið pláss fyrir mig og minn einkarekstur.   Þegar þú klífur fjöll og skíðar út og suður, er ég komin á business-nóturnar!   Reyndar gróf ég upp gömlu gönguskíðin í síðustu viku og fór nokkrar ferðir "cross-country-skiing" yfir túnin mín á frostfögru dögum. 

Gangi þér vel á skíðum, Bragi minn, en hafðu samband við mig þegar þú kemur heim, er með grand hugmyndir í ferðabransanum.

[Bragi Ragnarsson, 17.2.2009 kl. 22:08]

Gaman að heyra frá þér kæra vinkona og gott að þú ert að undirbúa einkaframtak, sem er nú ekki alveg nýtt hjá þér!

En láttu mig endilega heyra frá þér hvað þú hefur í huga.  Ég er reyndar að verða löglegt gamalmenni eftir nokkra daga en læt það vonandi ekki trufla mig.  En geri núna ekkert nema það sem ég hef gaman af!

Bið að heilsa Þórði og hlakka til að heyra frá þér aftur.