Ferðamálaþing

Sat Ferðamálaþing í dag og er allur uppveðraður eftir þessa uppákomu.  Framsögumenn voru forystumenn úr ferðamálageiranum, ráðherra ferðamála hr. Össur Skarphéðinsson og fleiri ráðamenn úr atvinnulífi og ferðamálum.  Að auki var forstöðumaður breskrar ferðaskrifstofu, Regent Travel og var mjög fróðlegt að hlusta á hann þar sem hann taldi að undanfarin neikvæð umræða um Ísland hefði einungis haft jákvæð áhrif á ferðaþjónustuna og væri ígildi milljóna punda í auglýsingafé í UK.

Samkvæmt framsögumönnum er bjart framundan í ferðamálum og um að gera að nýta sóknarfærin sem nú gefast.  Lítið var talað um vandamál þeirra skuldugu í greininni, þeim sem hafa tekið lán  í erlendum gjaldmiðlum og sjá nú ekki til lands, hvort sem lánin eru til uppbyggingar gistiaðstöðu eða kaupa á hópferðabílum eða súperjeppum.

Stefán Helgi Valsson bar fram fyrirspurn um löggildingu starfsheitis leiðsögumanna og kom fram að það mál er nú í vinnsu í ráðuneytinu.

Stjarna dagsins var Páll Ásgeir Ásgeirsson, hann flutti frábært erindi og hvatti til þess að við nýttum óþekktar náttúruperlur, sem engin veit um í dag. 

Ég þakka fyrir frábært ferðamálaþing. 

 

 

Athugasemdir

[Veraldarálfurinn (IP-tala skráð) 21.11.2008 kl. 11:01]

Forvitnileg hugmynd: Óþekktar náttúruperlur.

Mér finnst samt að einhverjir aðilar, t.d. hið opinbera, mætti huga meira að skipulagi sem bæði auðveldar aðgang að náttúruperlunum og jafnframt veitir þeim vernd, sem og auðveldar sprotafólki að skapa (heilbrigð) viðskipti.

Hef lengi beðið eftir þeirri stefnu. Hún er miklu meira virði - að mínu mati - en sumar virkjanir.

[Bragi Ragnarsson, 21.11.2008 kl. 15:15]

Eins og talað út úr mínu hjarta.  Það þarf að ákveða hvaða náttúrperlur á að hafa til sýnis og búa til auðvelt aðgengi að þeim.  Þannig er líka hægt að dreifa álaginu og minnka ágang, t.d. í Landmannalaugum.  Og auðvitað þarf að gera það sama með virkjanir, bæði vatns- og jarðhita.  Það þarf að taka frá ákveðin svæði þar sem ekki verður virkjað og borað, t.d. Torfajökulsvæðið en eyrnamerkja önnur sem menn geta fallist á að nýta.  En það er víst í vinnslu núna.