Sundlaugarferð

Það voru snarpar umræður í pottinum í morgun.  “Auðvitað eiga þessir hálfvitar sem eru búnir að koma okkur í þessa stöðu að segja af sér, rjúfa þing og kjósa” sagði belgmikill maður í sundskýlu sem rétt náði að hylja hálfan bossann.  “Ég er ekki sammála því” sagði annar og miklu grennri, með miklum þunga. “Þeir eru búnir að setja saman björgunaráætlun og nú verða þeir að fá vinnufrið og klára dæmið”  Fleiri blönduðu sér í umræðuna og sýndist sitt hverjum. 

 

Mikið skelfing er erfitt að mynda sér skoðun á fólki sem er nakið eða bara í sundskýlu.  Það er engin leið að sjá hvort viðkomandi er uppstrílaður íhaldsmaður eða tötralegur hálfkommi.  Ef maður bara vissi hvort hann klæðist brotabuxum og bindi eða er bindislaus í gallabuxum er strax komið eitthvað til að byggja á.  Sá með bindið hlýtur að vera hægri sinnaður lögfræðingur eða bankastarfsmaður og hinn trúlega sósíalisti, kennari, iðnaðarmaður eða atvinnulaus, nema hann sé kannski allt þetta.

 

En umræðan hélt áfram. “Krónan er ónýt og ekkert upp á hana að púkka.  Ekkert annað að gera en koma sér í Evrópusambandið sem allra fyrst og taka upp evruna” sagði miðaldra kona með sundhettu og engin leið að átta sig á hennar stöðu í lífinu, gæti verið bara húsmóðir, hjúkka eða kennari.  Eldri maður gerði athugasemd við þetta og spurði:  “Hvað verður þá um fiskimiðin okkar og hvernig eiga bændur að lifa þegar við fáum óheftan innflutning landbúnaðarvara frá Evrópu?”

 

Ég ákvað að blanda mér ekki í umræðurnar, fór og synti mína venjulegu vegalengd og reyndi að hugsa ekki um pólitík eða efnahagsmál.  Náði að hreinsa hugann og hugsaði um hvað vatnið væri dásamlega mjúkt og blautt og volgt; hvað það væri notalegt að hreyfa sig í vatninu og einbeitti mér svo að stílnum, ef það skyldi einhver vera að fylgjast með mér.

Athugasemdir

[Kjartan Pétur Sigurðsson, 22.11.2008 kl. 16:34]

Skemmtilegar pælingar. Ég hef sjálfur unun af því að stúdera fólkið í kringum mig, hefði att að verða atferlisfræðingur eða mannfræðingur :)

[Björn Birgisson, 23.11.2008 kl. 14:04]

Hvað syndir þú langa vegalengd frændi?

[Bragi Ragnarsson, 23.11.2008 kl. 16:02]

Sæll frændi, gaman að heyra frá þér og til hamingju með daginn, stórafmæli frænku okkar á Ísafirði.

Þetta er nú ekkert orðið sem ég syndi en þó aldrei minna en 1200 metrar.  Þá gefst gott tækifæri til íhugunar. Og fer alltaf í Kópavogslaug, sem ég tel bestu laug á Íslandi og þó víðar væri leitað.  Ert þú syndari eins og ég?

[Björn Birgisson, 23.11.2008 kl. 16:42]

Sæll! Sömuleiðis til hamingju með Auði Hagalín. 1200 m er frábært. Ég er syndari, en syndi mjög sjaldan. Kveðjur.