Gönguferð um Hengladali

Fór í mjög skemmtilega gönguferð í gær með nokkrum frábærum konum.  Gengum úr Sleggjubeinsskarði, um Hengladali, meðfram Ölkelduhnúk, niður Reykjadal í Hveragerði.  Og fórum auðvitað í bað í Reykjadalsá. 

Orkuveitan hefur látið stika þessa leið, sem er ágæt framkvæmd, en ekki er einfalt að keyra að bílastæðinu þar sem leiðin liggur upp Sleggjubeinsskarð vegna þess að þegar ekið er framhjá stöðvarhúsi Hellisheiðarvirkjunar er skilti sem segir að þetta sé lokað vinnusvæði og óviðkomandi sé ekki heimilt að aka lengra.  Væntanlega snúa ókunnugir frá, enda engar upplýsingar sýnilegar um hvert eigi að fara.

Ekki virðist þessi fína gönguleið vera mikið gengin og sáum við ekki nokkurn mann fyrr en komið var að Ölkelduhnúk, en þar og við Reykjadalsá var slæðingur af fólki.

Mér finnst ég hafi séð meira en áður af kindum sem ekki hafa verið rúnar, með reyfistætlur hangandi á sér.  Hef heyrt þá skýringu að bændum finnist ekki taka því að rýja þar sem ullarverð sé svo lágt.  Þetta er ljótt að sjá og ég held að þetta hljóti að vera skepnunum til mikilla óþæginda og er að sjálfsögðu viðkomandi bændum til mikillar skammar.    Þurfa dýraverndunarsamtök ekki að láta þetta til sín taka?

 BR  

Athugasemdir

[Þorkell G. (IP-tala skráð) 7.7.2008 kl. 11:54]

Sæll, skólabróðir. Merkilegt er þetta líf. Þegar ég var yngri var ég nánst hvenær sem færi gafst í einhverju fjallaflakki, en nú er ég alveg (nærri alveg) hættur því. Læt duga að skreppa á sjó þegar ég hef stund og veður leyfir. En þú ert alveg á bólakafi í þessu sé ég. Annars saknaði ég þess að sjá þig ekki á 45 ára útskriftarafmælinu í fyrra. Það var góður gleðskapur og gaman að hittast.

kv. gþg

[Bragi Ragnarsson, 7.7.2008 kl. 17:10]

Sæll félagi og takk fyrir kveðjuna.  Ég vinn nokkuð stíft við leiðsögnina á sumrin og var einmitt upptekinn við það í fyrra þegar 45 ára afmælið okkar var.  Sjáumst alla vega í 50 ára  afmælinu, fer að styttast í það.

Bestu kveðjur á Krókinn