Ódýra Ísland

Er búinn að vera með nokkra ameríkana hér undanfarna daga og ferðast með þá um landið, ýmist í kolvitlausu veðri eða allsæmilegu.

Þeir gistu á Hilton, sem þeim fannst á mjög hagstæðu verði.  Svo borðuðu þau kvöldverði á Vox og Sjávarkjallaranum, sem var líka mjög ódýrt og áttu engin orð yfir gæðin og frábæra þjónustu.  Sögðu að svona málsverðir á svona fínum stöðum myndu kosta tvöfalt í NY.

Hef verið að svipast um eftir norðurljósum, þá sjaldan sem hefur komið glufa í skýin.  Skemmst er frá því að segja að ég hef engin séð.  Getur verið að það sé vegna minni sólgosa?  Eða hef ég bara verið óheppinn?  Látið endilega í ykkur heyra ef þið hafið séð eitthvað. 

Athugasemdir

[Þorkell Guðbrandsson (IP-tala skráð) 8.10.2008 kl. 18:27]

Sæll gamli félagi! - Ég hef það privilegium að geta án mikillar fyrirhafnað farið út úr mestu ljósáhrifunum meðan myrkur er og fylgist því ansi vel með ljósfyrirbrigðum himinhvolfsins. Ég verð að taka undir með þér með það, að núna í haust verður maður sárasjaldan var við norðurljós. Eins og ég veit að þú þekkir, þá verður maður var við áhrif norðurljósanna þótt skýjað sé, ef maður er staddur þar sem ljósáhrif frá byggð eru lítil. Þannig að ég tel mig geta fullyrt að minna er um norðurljós en venjulega.

[Bragi Ragnarsson, 9.10.2008 kl. 12:00]

Sæll gamli vinur og takk fyrir innleggið.  Þetta staðfestir væntanlega að minna er um norðurljós en vænta mátti og ég held að menn ættu þá að fara varlega í að selja útlendingum sérstakar norðurljósaferðir, eins og verið er að gera.

Bestu kveðjur til Álfs.