Iguazu fossarnir

Höfum verið að skoða fossana í allan dag og þeir eru aldeilis stórkostlegir.  Þetta eru í raun margir fossar og hægt að nálgast þá með ýmsum hætti.  Við höfum kíkt á þá frá ýmsum sjónarhornum og gengum inn í úðann í morgun í ágætu veðri og blotnuðum lítillega.  En það var bara forsmekkur af því sem síðar varð!  Það skall nefninlega á okkur þessi líka litla rigning og hefur helliringt í allan dag.  Við sigldum svo með bát undir fossana og inn í úðann, sem var svo sem ágætt því hann var heitari en rigningin.  Keyrðum svo með trukk í gegnum regnskóginn og öll vorum við gegnblaut og allt okkar dót eftir þessa svaðilför.

En erum nú komin upp á hótel og orðin heit og þurr aftur.  En enn rignir.  Í fyrramálið ætlum við að keyra yfir til Brasilíu og skoða fossana þeim megin, sem ku ekki vera síðra.  En vonandi verður sólin þá farin að skína aftur.    Fljúgum svo seinnipartinn á morgun aftur til Buenos Aires og ætlum að borða nautasteik hjá Finni, sem hann auðvitað eldar af sinni alkunnu snilld.

Þökkum Helgu, Ingu og fleirum fyrir kveðjur sem við höfum fengið í athugasemdirnar á blogginu og biðjum fyrir bestu kveðjur til allra.

Athugasemdir

[Lára Hanna Einarsdóttir, 30.10.2008 kl. 01:38]

Ég vildi sko alveg vera með ykkur... 

[Kjartan Pétur Sigurðsson, 30.10.2008 kl. 19:53]

Fær maður ekki að sjá myndir úr ferðinni?

[Guðrún Björk Bjarnadóttir (IP-tala skráð) 6.11.2008 kl. 13:51]

Sæl. Gaman að fylgjast með ykkur á ferðalaginu. Bróðir minn var skiptinemi fyrir allmörgum árum í Resistencia í Argentínu sem er ekki svo langt frá Iguazu fossunum. Þið eruð ekki að missa af neinu héðan nema áhyggjum af efnahagsástandinu.